महागाव येथे ‘माझी वसुंधरा ७.०’ व ‘मुख्यमंत्री समृद्ध पंचायत राज’ अंतर्गत वृक्षारोपण

तळा ( किशोर पितळे ) मुख्यमंत्री समृद्ध पंचायत राज व माझी वसुंधरा अभियान ७.० अंतर्गत ग्रुप ग्रामपंचायत महागावच्या वतीने वरदायिनी माता मंदिर परिसरात नुकतेच भव्य वृक्षारोपण करण्यात आले. “शासनाच्या या उपक्रमांतर्गत केवळ वृक्षारोपण करून न थांबता, ग्रामपंचायत प्रशासन व नागरिकांनी या लावलेल्या झाडांचे संवर्धनासोबतच प्रामाणिकपणे संगोपन करावे,” असे कळकळीचे आवाहन महागावच्या प्रशासक तथा विस्तार अधिकारी श्रीम. पुष्पा नेरकर यांनी यावेळी मार्गदर्शन करताना केले. 

याप्रसंगी आयोजित कार्यक्रमात श्रीम. पुष्पा नेरकर (प्रशासक तथा विस्तार अधिकारी), श्री. मुंढे, डॉ. रघुनाथ पोवार, सुवर्णा तांबडे, संतोष आमले, कृष्णकांत मानकर, रामभाऊ तांबट, कमलाकर मांगले, विठोबा साबळे, चोगले अप्पा,  केंद्रप्रमुख सुनील लोखंडे, मुख्याध्यापक सुनील बैकर, महागाव ग्रामपंचायत कर्मचारी आणि महागाव ग्रामस्थ मंडळाच्या उपस्थितीत मंदिर परिसरात विविध प्रकारच्या वृक्षांचे रोपण करण्यात आले.

💬 झाडे लावा, झाडे जगवा अन् त्यांचे पालकत्व स्वीकारा!

मार्गदर्शन करताना विस्तार अधिकारी पुष्पा नेरकर म्हणाल्या की, शासनाचा “झाडे लावा झाडे वाढवा” हा अत्यंत स्तुत्य उपक्रम असून यापूर्वीही ग्रामपंचायत, सामाजिक संस्था आणि सेवाभावी संस्थांच्या माध्यमातून याला उत्तम सहकार्य लाभले आहे. झाडे जगवण्यासाठी त्यांनी खालील महत्त्वाच्या मुद्द्यांवर भर दिला:

• संरक्षण: लावलेल्या लहान रोपट्यांना काठीचा आधार देणे आणि गुरांपासून वाचवण्यासाठी ‘पॉलिकॅब कापड’ किंवा कुंपणाचे संरक्षण देणे गरजेचे आहे.

• पाण्याची सोय: पावसाळ्यानंतरही ही झाडे जगवण्यासाठी त्यांना नियमित पाणी देणे गरजेचे असून नागरिकांनी त्यांचे पालकत्व स्वीकारले पाहिजे.

• पर्यावरणाचा समतोल: वृक्षारोपणामुळे प्राणवायूची (ऑक्सिजनची) कमतरता भरून निघेल, जमिनीतील पाण्याचे बाष्पीभवन कमी होईल आणि पर्यावरण संतुलित राहून वाढती उष्णता कमी होण्यास मदत होईल.

“ज्या ओसाड माळरानावर किंवा गायरान जागेवर आपण वृक्षारोपण करत आहोत, ती सर्व झाडे आपण जगवली पाहिजेत. या वृक्षारोपणाचा फायदा भविष्यात आरोग्याच्या दृष्टीने नक्कीच चांगला होईल. आपली महागाव ग्रामपंचायत तालुक्यात नंबर वन झाली पाहिजे, यासाठी सर्वांनी मिळून प्रयत्न करावेत.”

— पुष्पा नेरकर (विस्तार अधिकारी, तळा)