देवकुंड धबधबा दुर्घटना: सुरक्षेचे आवाहन धुडकावले; पोलिसांना ‘चॉकलेट’ की ‘कॅटबरी’ मिळाल्याने उडाला प्रवेशबंदीचा फज्जा?

रोहिदास नगर / गोरेगाव ( विशेष प्रतिनिधी ) माणगाव तालुक्यातील अत्यंत प्रसिद्ध आणि तितकाच जीवघेणा ठरत असलेला ‘देवकुंड धबधबा’ परिसरात काल, रविवार दिनांक १२ जुलै २०२६ रोजी पुन्हा एकदा काळाने घाला घातला आहे. प्रशासनाने पावसाळ्याच्या पार्श्वभूमीवर या भागात जाहीर केलेली कडक प्रवेशबंदी केवळ कागदोपत्रीच ठरल्याचे या दुर्दैवी घटनेने पुन्हा एकदा सिद्ध केले आहे. पुणे जिल्ह्यातील चाकण येथून पर्यटनासाठी आलेल्या २१ युवकांच्या ग्रुपमधील दोन तरुणांचा धबधब्याखालील खोल कुंडात बुडून मृत्यू झाला आहे.

🚨 काल दुपारी घडली होती दुर्घटना; नेटवर्कअभावी मदतीला झाला होता उशीर

मिळालेल्या माहितीनुसार, चाकण येथील २१ तरुणांचा एक ग्रुप देवकुंड परिसरात पर्यटनासाठी आला होता. रविवार दि. १२ जुलै रोजी दुपारी साधारण १ वाजून ५७ मिनिटांच्या सुमारास या ग्रुपमधील गोपाळ रामराव राठोड (वय २४ वर्षे) आणि विष्णु ढोक (वय २३ वर्षे) हे दोघे धबधब्याखालील खोल कुंडात पोहण्यासाठी उतरले होते. मात्र, पाण्याचा आणि खोलीचा अंदाज न आल्याने ते दोघेही पाण्यात बुडाले.

धोकादायक क्षेत्र असल्याने देवकुंड परिसरात मोबाईल नेटवर्क उपलब्ध नव्हते, ज्यामुळे दुर्घटनेची माहिती वेळेवर बाहेर पोहोचू शकली नाही. आज सकाळी ‘शेलार मामा रेस्क्यु टीम’ आणि स्थानिक प्रशासनाने राबवलेल्या संयुक्त शोधमोहिमेदरम्यान अखेर एका तरुणाचा शव बाहेर काढण्यात यश आले आहे, तर दुसऱ्या बेपत्ता तरुणाचा शोध अद्याप सुरू आहे.

📩 संपादक प्रसाद गोरेगांवकर यांनी तहसीलदारांना आधीच दिली होती पूर्वकल्पना!

या दुर्घटनेपूर्वी काही दिवसांपूर्वीच दरड कोसळल्यामुळे या भागात सुरक्षेचे पालन करण्याचे आणि कडक बंदी आदेशाचे पालन करण्याचे आवाहन करण्यात आले होते. निसर्गाचा आनंद घेताना पर्यटकांनी स्वतःच्या सुरक्षेला सर्वोच्च प्राधान्य द्यावे, कोणत्याही धोकादायक ठिकाणी किंवा धबधब्यांच्या कुंडात उतरू नये, असा इशारा आधीच देण्यात आला होता.

इतकेच नव्हे तर, ‘रायगड प्रतिबिंब’चे संपादक प्रसाद गोरेगांवकर यांनी दुर्घटना घडण्याच्या आदल्या दिवशी थेट मा. तहसीलदारांना व्हॉट्सॲपवर मेसेज करून, तिथे कोणताही अनुचित प्रकार घडू नये यासाठी तातडीने दक्षता घेण्याची पूर्वकल्पना दिली होती.

परंतु, एका जबाबदार संपादकाने दिलेला हा सुरक्षेचा इशारा महसूल विभाग आणि पोलीस प्रशासनाने पूर्णपणे हवेत मिळवला. काल जवळपास एक हजाराहून अधिक पर्यटक या ठिकाणी आले असल्याची चर्चा आता स्थानिकांमध्ये रंगू लागली असून, एवढ्या मोठ्या गर्दीकडे प्रशासनाने हेतुपुरस्सर डोळेझाक केल्याचे स्पष्ट होत आहे.

🍬 पोलिसांना ‘चॉकलेट’ दिले की ‘कॅटबरी’? जनतेचा संतप्त सवाल!

माणगावचे प्रांताधिकारी संदिपान सानप यांनी ताम्हिणी घाट, सिक्रेट पॉइंट आणि देवकुंड परिसरात पावसाळ्यातील जीवितहानी टाळण्यासाठी कलम १६३ अंतर्गत कडक प्रवेशबंदी लागू केली होती. जर ही बंदी लागू होती आणि तहसीलदारांना मेसेज करून आधीच सावध केले होते, तर हजारहून अधिक पर्यटक सुरक्षा यंत्रणेची नजर चुकवून धबधब्यापर्यंत पोहोचतातच कसे?

या गंभीर ढिसाळपणामुळे आता स्थानिक नागरिकांमधून एकच उपरोधिक प्रश्न विचारला जात आहे— “या घटनेनंतर तिथे ऑन-ड्यूटी असणाऱ्या पोलिसांना स्थानिकांनी किंवा एजंटनी चॉकलेट दिले होते की कॅटबरी?” अशा कोणत्या ‘गोड खाऊ’मुळे सुरक्षेचा थेट इशारा आणि हजारो पर्यटकांची गर्दी असतानाही यंत्रणेने आपले डोळे बंद केले होते, अशी तीव्र चर्चा आता रंगू लागली आहे.

❓ प्रशासनाला थेट प्रश्न:

• तहसीलदार साहेब, त्या मेसेजवर ॲक्शन का घेतली नाही? ‘रायगड प्रतिबिंब’च्या संपादकांनी पूर्वकल्पना दिली गेलेली असताना आणि हजारो पर्यटकांची गर्दी होत असताना पर्यटनस्थळावरील बंदोबस्त कडक का करण्यात आला नाही?

• सुरक्षा यंत्रणा काय करत होती? प्रवेशद्वारांवर आणि तपासणी नाक्यांवर तैनात असलेले पोलीस कर्मचारी आणि महसूल अधिकारी नेमकी कोणती ड्युटी बजावत होते?

• दोषींवर निलंबनाची कारवाई कधी होणार? कर्तव्यात कसूर करणाऱ्या संबंधित ऑन-ड्यूटी पोलीस आणि महसूल कर्मचाऱ्यांवर तात्काळ गुन्हे दाखल करून निलंबनाची कारवाई केली जाणार का?

📢 प्रशासकीय सद्यस्थिती:

‘शेलार मामा रेस्क्यु टीम’ने एका तरुणाचा मृतदेह बाहेर काढला असून, त्याची अधिकृत ओळख पटवण्याचे काम सुरू आहे. तसेच दुसऱ्या बेपत्ता तरुणाचा शोध घेण्यासाठी जीवरक्षक पथक शर्थीचे प्रयत्न करत आहेत. मात्र, या दुर्घटनेमुळे रायगडमधील पर्यटन सुरक्षा आणि प्रशासकीय अंमलबजावणीचा पुरता बोजवारा उडाल्याचे स्पष्ट चित्र दिसत आहे.