मे महिन्यात झुलता पूल काढल्याचा पाटबंधारे विभागाचा दावा; मग देवकुंडात दुर्घटना घडलीच कशी?

रोहिदास नगर / गोरेगाव (प्रसाद गोरेगावकर) माणगाव तालुक्यातील पर्यटनदृष्ट्या अत्यंत संवेदनशील आणि तितक्याच धोकादायक मानल्या जाणाऱ्या प्रसिद्ध देवकुंड धबधब्यावर अखेर ती दुर्दैवी दुर्घटना घडलीच, आणि दोन पर्यटकांना आपला निष्पाप जीव गमवावा लागला. या काळीज पिळवटून टाकणाऱ्या घटनेनंतर आता प्रशासकीय यंत्रणेचे धाबे दणाणले असून, विशेषतः पाटबंधारे विभागाची संशयास्पद भूमिका आणि दाव्यांचा पोकळ कारभार उघडा पडला आहे.

स्थानिकांचा दावा: भिरा मार्ग बंद, मग पर्यटकांनी धबधबा गाठला कसा?

स्थानिकांनी दिलेल्या अत्यंत महत्त्वाच्या माहितीनुसार, देवकुंड धबधब्याकडे जाण्यासाठी प्रामुख्याने केवळ दोनच मार्ग उपलब्ध आहेत. यातील पहिला मार्ग ‘भिरा’ गावातून जातो; मात्र, पोलिसांनी तेथे कडक बंदोबस्त ठेवून पर्यटकांना भिरा मार्गाने जाण्यास पूर्णपणे मज्जाव (बंदी) केला होता. त्यामुळे पर्यटकांकडे उरतो केवळ दुसरा मार्ग—जो ‘पाटणूस’ भागाकडून जातो.

स्थानिकांच्या मते, जर पर्यटक भिरा गावातून न जाता पाटणूस भागातून गेले असतील, तर त्यांना धबधब्यापर्यंत पोहोचण्यासाठी झुलत्या पुलावरूनच जाणे अनिवार्य (बंधनकारक) आहे. आता मुख्य प्रश्न असा निर्माण होतो की, जर पाटबंधारे विभागाच्या दाव्यानुसार मे महिन्यातच तो झुलता पूल पूर्णपणे काढून निष्कासित करण्यात आला होता, तर मग पर्यटकांनी धबधब्यापर्यंतचा मार्ग पार केला कसा आणि ते घटनास्थळी पोहोचलेच कसे? या एकाच प्रश्नाने पाटबंधारे विभागाच्या संपूर्ण दाव्याची हवा काढली आहे.

दाव्यात ‘नो पूल’, मग घटनास्थळी काय भूत उभे होते?

मान्सूनपूर्व सुरक्षेचा एक भाग म्हणून मे महिन्यातच देवकुंड कडे जाणारा अत्यंत धोकादायक झुलता पूल काढून टाकल्याचा पाटबंधारे विभागाने ठाम दावा केला आहे परंतु, दुर्घटनेच्या दिवशी प्रत्यक्ष घटनास्थळावरून समोर आलेले थरारक व्हिडिओ आणि सोशल मीडियावरील रील्स पाहिल्यास, तोच झुलता पूल तिथे जसाच्या तसा उभा असल्याचे आणि शेकडो पर्यटक त्यावरून जीव धोक्यात घालून ये-जा करत असल्याचे स्पष्ट दिसले.

जर पाटबंधारे विभागाने मे महिन्यात खरोखरच हा पूल काढून सरकारी जमा केला होता, तर मग दुर्घटनेच्या दिवशी तोच पूल त्या ठिकाणी पुन्हा आलाच कसा? तो काय आपोआप उभा राहिला, की पाटबंधारे विभागाने निव्वळ कागदी घोडे नाचवून वरिष्ठांची आणि जनतेची धूळफेक केली? असा थेट आणि संतप्त सवाल आता नागरिक विचारत आहेत.

पर्यटकांवर गुन्हे, मग जबाबदार अधिकाऱ्यांना अभय का?

भिरा धरण प्रकल्प आणि देवकुंड परिसर हा थेट पाटबंधारे विभागाच्या सुरक्षेच्या अखत्यारीत येतो. असे असताना, जर स्थानिक एजंट्स, गाईड्स किंवा ट्रेकिंग ग्रुप्सनी पैशांच्या हव्यासापोटी आणि पर्यटकांना आकर्षित करण्यासाठी तो पूल बेकायदेशीरपणे पुन्हा उभारला होता, तर पाटबंधारे विभागाच्या सुरक्षा रक्षक आणि अधिकाऱ्यांना याची साधी पुसटशी खबरही कशी लागली नाही? दरवर्षी पावसाळ्यात हजारो पर्यटक येथे येतात हे माहीत असूनही, पाटबंधारे विभागाने प्रत्यक्ष घटनास्थळी जाऊन पाहणी करण्याचे सौजन्य का दाखवले नाही?

दुर्घटनेनंतर पोलीस यंत्रणेने पर्यटकांवर, स्थानिक गाईड्सवर आणि इंस्टाग्रामवर रील्स बनवणाऱ्यांवर घाईघाईने गुन्हे दाखल करून कारवाईचा देखावा उभा केला आहे. परंतु, ज्यांच्या अक्षम्य हलगर्जीपणामुळे आणि निष्काळजीपणामुळे हा बळी गेला, त्या पाटबंधारे विभागाच्या मूळ जबाबदार अधिकाऱ्यांवर ही मेहेरबानी का? असा सवाल आता उपस्थित केला जात आहे.

तातडीने सखोल चौकशीची मागणी

मे महिन्यात पूल हटवल्याचा खोटा दावा करून आणि प्रत्यक्षात परिस्थितीकडे दुर्लक्ष करून निष्पाप पर्यटकांच्या जिवाशी खेळणाऱ्या पाटबंधारे विभागाच्या संबंधित अभियंता आणि अधिकाऱ्यांची वरिष्ठ पातळीवरून निष्पक्ष चौकशी व्हावी आणि दोषींवर कडक कारवाई करण्यात यावी, अशी तीव्र मागणी भिरा पाटणूस परिसरासह संपूर्ण रायगड जिल्ह्यातून केली जात आहे.